جموں و کشمیر کے ریاستی درجہ کی بحالی اسمبلی انتخابات کے بعد؛ انتخابات کا وقت الیکشن کمیشن مقررکرے گا:امت شاہ

مرکزی وزیر داخلہ امیت شاہ نے کہا ہے کہ جموں و کشمیر کو ریاست کا درجہ اسمبلی انتخابات کے بعد دیا جائے گا اور انتخابات کے وقت کے بارے میں فیصلہ الیکشن کمیشن کرے گا۔
قومی خبر رساں ایجنسی کے ساتھ خصوصی انٹرویو میں شاہ نے یہ بھی کہا کہ جموں و کشمیر میں حالات میں بہتری آئی ہے اور دہشت گردی سے متعلق اعداد و شمار سب سے کم ہیں۔
شاہ نے کہا کہ جموں و کشمیر سے متعلق آرٹیکل 370، جسے 2019 میں بی جے پی کی قیادت والی حکومت نے منسوخ کر دیا تھا، نے ملک کو نقصان پہنچایا ہے۔
انہوں نے کہا کہ جموں و کشمیر میں ترقی ہو رہی ہے، دہشت گردی آہستہ آہستہ ختم ہو رہی ہے۔
انہوں نے کہا کہ تمام اعداد و شمار دیکھیں، جموں و کشمیر میں کافی تبدیلی آئی ہے۔
شاہ نے کہا کہ حکومت بائیں بازو کی انتہا پسندی سے نمٹنے میں موثر رہی ہے اور خالصتان کے ہمدردوں کی سرگرمیوں پر گہری نظر رکھے ہوئے ہے۔
وزیرِ داخلہ نے کہا کہ وہ جموں و کشمیر میں انتخابات کے وقت پر تبصرہ نہیں کر سکتے۔
انہوں نے کہا، ”میں نے واضح طور پر کہا تھا کہ جموں و کشمیر میں انتخابات کے بعد ریاست کا درجہ بحال کیا جائے گا۔ یوٹی میں ووٹر لسٹ کی تیاری کا عمل مکمل ہونے کے قریب ہے۔ اب، الیکشن کمیشن کو انتخابات کے بارے میں فیصلہ کرنا ہوگا “۔
جموں و کشمیر میں نئی قیادت کے ابھرنے کے بارے میں ان کے پہلے بیان کے بارے میں پوچھے جانے پر، شاہ نے کہا کہ نئی قیادت ان بلدیاتی اداروں سے ابھرے گی جہاں پہلے انتخابات ہوئے تھے۔
انہوں نے کہا،”جو پنچ اور سرپنچ منتخب ہوئے ہیں، ان میں سے نئی قیادت سامنے آئے گی… جب سے جموں و کشمیر میں دہشت گردی شروع ہوئی، دہشت گردی سے متعلق اعداد و شمار آج سب سے کم ہیں۔ اب کروڑوں سیاح اور یاتری جموں و کشمیر کا دورہ کر رہے ہیں۔ یہ ایک بہت بڑی تبدیلی ہے “۔
شاہ نے کہا کہ دفعہ 370 کو ہٹانا بی جے پی اور جن سنگھ کے ایجنڈے میں شامل ہے۔ انہوں نے آرٹیکل 370 کے تناظر میں ہندوستان کے پہلے وزیر اعظم جواہر لال نہرو کا بھی حوالہ دیا۔
شاہ نے کہا،1950 سے، جموں و کشمیر سے دفعہ 370 کو ہٹانا ہمارے ایجنڈے پر تھا۔ آج جس طرح سے جموں و کشمیر ترقی اور دہشت گردی میں کمی دیکھ رہا ہے اس سے ظاہر ہوتا ہے کہ تبدیلیاں ہونے والی ہیں۔
شاہ نے کہا کہ بی جے پی پر تنقید کرنے والوں کو جواب دینا چاہئے کہ جموں و کشمیر میں دہشت گردی کس کے دور میں بڑھی۔
جہاں تک انتخابات کا تعلق ہے تو کیا انہیں بلدیاتی انتخابات یاد نہیں، یہ ہمارے دور حکومت میں ہوئے، یہ 70 سال سے نہیں ہوئے۔ جموں و کشمیر میں تین خاندانوں کا راج تھا اور وہ شور مچا رہے تھے… فاروق عبداللہ انگلینڈ گئے ہوئے تھے۔ کس کے دور میں دہشت گردی بڑھی، کس نے بڑھنے دی، اس کا جواب سابقہ حکمرانوں کو دینا چاہیے۔